احمد الصالحي

اشعدّي بالانبار خاطــــــــــر بيها اموت
حدّي سامــــــــــــــــــــرّه وردّن ليوره
إلي بيها ابيّيــــــــــــت لو كومة جهال
لو هناك امحدده براســـــــــــي المره
الرمادي امكيجه وطلعـــــــــت عروس
الخدود امورده .. شفّـــــــــــه محمره
ياهو كَال انباكَت ابنيّـــــــــــــة الأصول
ومو عراقية أصـــــــــــــــــــــل ومزوره
بنيّه كشختها بلبــــــــــس دم الجنوب
وتركَص وتتمــــــــــــــــايل بكل مفخره
شبيها ستــــــــر الله عليها أم الحجاب
امدلـلـه .. ومتحشّمـــــــه .. ومتعطره
هواي خطابتها مـــــــــــــــن كل البلاد
وداعش اولهم لزم ليهـــــــــــــا السره
غير داعش دينه من ديـــــن الرسول ؟
وهيه ملتزمه .. وشريفـــــه .. امخدره
من الأصول اتوافـــــــــــــق بهذا الزواج
والمهر روس التـــــــــــــــوالي الحيدره
ومن كثر ما عرّست يوميــــــــه اشوف
تنذبح كَدّامها اشجـــــــــــــــــم مجزره
الشرع عدهــــــــــــــــم يحلل هالزواج
كثرة الازواج داعــــــــــــــــــــــش قرره
وآنه شنهو العندي حتى اكشـخ واروح
لا عزيمه ولا بطاقـــــــــــــــه امسطره
لا كَرايب بيهــــــا لا حتـــــــــــى عمام
ولا صديـــــــج ولا خـــــــــوال مصوكَره
بنيّه عدهم حلّت السّـــــــــــــن الزواج
خلّي تتزوج عساهــــــــــــــــا اميسره