مصطفى الخزاعي

ليليه ارد مهضوم!!!!!
وشوفي يبات بظهور المشو مصلوب..
وليليه الطريج يضيع بعيوني
 ويخضر مستحاي دروب!!
خايف والمناره البيهه طعم
 الخوف يتطشر صداهه ذنوب…
وليليه اعله بابك مشتهاي يذوب…
واغنيلك ترس روحي ..
شيسرگ اعيونّه يالسرگيت البوب،،
وشيرد مجرى الضوه لزوده
لون هدت مساحي غروب..
سگيت بطيفك الراوي اعله بالي
 سنين ياهلبت يطگ مكتوب..
وياهلبت عرفت الرادك
 بعمره وطلعت براي،
ياصبّير يالعمرك خلق بالگيض
واظنونك غفت بالماي!!!
يامدري شكو.. بروحي طواري
 شموس وبعيني محاچي فياي.
مشيت ومادريت شطاف
 بعيونك عتب لو راي؟
وشيطوف بمكاتيب العطش
 للغيم غير الماي..
يالاحو عناگيدك عجب مافززاك
 الشوگ وملاعب صواعيدك.
وجزيت اچم محطة نوم…..
 ولا رعشة حلم بيدك..
وزرعت بصبخة طيوفك
 حلم ملگه ولاطگت مواعيدك،،
يالاحو عناگيدك ولاظنيت
 ينفك لخضارك باب..
وگتلي… وگتلك من سنين ..
كلشي يطوف بظنون المساحي تراب!!
وكلشي يفيض بعيون العطش خنياب،،
وكلشي يعاتبك بيه..
 ايتسولف للمرايه معاتب الغيّاب..
ويغرگ بالمرايه المابوجهه عتاب!!
وحادور العمر عده..
 واخذني مبلل بطاريك.
يامزنه خذاني البيك..
يامزنه العمر هاگد شرب
ساعات ماوشّل نبع طاريك..
وارد اشتل لهفتي بوحشة
 الشباچ گمريه!
عسه يخظّر بعيني اخيال .
.ويشح جاري الحزن بيه..
ويورّد طولك بعيني….
واشوفك حسبه مگظيه……