صباح العتابي

 مخنوگ وطواريك تدز صوغة
هوه لريتي
وصورك كحل لعيوني
وحرز خليتهه ابيتي
چم مره لجبت روحي
 يعت بيهه الهوه لصوبك
شبعد ذيچ المسافه
وكصراهه الشوگ ثاري الجدم
مايتعب عمر لو يمشي بدروبك
يمغير طبع روحي
ويالمحببني باسلوبك
چم مره لهجرت اولايتي وجيتك
تهت بولاية اعيونك
وچم مره لعفت لوني وحچيت
اسوالفي بلونك
اجي عطشان كل روحي واشرب
خمرة اعيونك واسكر بس ولا اروه
والوم بروحي وي روحي هويت
هواي من گبلك وبس يمك عرفت اهوه
شفتكً زرع تستاهل توشلني وانه
بروحي سوالف غيم
وكلشي البيه الك من الجدم للغيم
شسوي بروحي اذا مو باالنحبه اتهيم
شنفعه السيف اذا مايرد عني الضيم
بخيت ومن اشم عطرك أرد ومرادي
 بچفوفي والفرحه ترس وجهي
 طفل بالعيد
وماينشبع منك ياهوه اعذيبي
 اريد اتنفسك غيرك نفس ماريد
صوغ ازنودك اگلاده لرگبتي
 اتلوگ ومد ايدك عله اجفوفي
حلاة الممشه ايد بأيد
ضَل يمرايتي الماتعرف اتجامل
وأضل امگابلك واشربني بعيونك
ووين تريد اروح وياك تستاهل
تعال وگودني أمن أيدي وأروح
 اوياك لوعمرين
ونسولف سوالف شوكنه السمره
سولفلي السوالف ونسة الفقره
وخل حبنه اعله حب الله
ايبارك الله بالعشاگ اذا حبوا عله الفطره