زين العابدين السعيدي

خم ربعك عدل لا تطرب اويه الصيت
واكتب زينهم والشين هم كتبه
ولتظن كل بشر يوكف بعينه الزين
تره بعين ابره ماوكفت الكعبه
اليسولفلك جذب خل حصته لمكفاك
الما يحجي ابخت لتروحله بعتبه
البفعاله قزم ويريد يعله اعليك
حياك الله كله وعوفه يتشلبه
مو كلمن كعد بالكوسر ابن اجواد
واحسبها عدل لاتظلم العتبه
اليرجف من خياله ينشر بتموز
بس وكت البرد تتراوس الحسبه
الماعنده جنح يكره رفيف الطير
وتلكه بشفته كل زاحفه امجلبه
الما راضع وفه سولفله مال البير
ما يستوعب الجفين والجربه
الباله عطش سالفته بس عاكول
بسالفة النده ماعنده كل رغبه
والباله نهر سالفته حلوه تصير
مدري شلون تطلع مالحه وعذبه
اليشعر بالنقص مايدري وين يروح
وفلسفة الكمال بداخله تعذبه
البراسه فراغ الذله تستنكاه
يحس لمن يدنك يرتفع رتبه
والبراسه وطن عنده الكرامه شراع
يحس لمن يدنك ينكسر شعبه
اليذم الورد وجدانه مابي روح
والعاجبته روحه الناس متعجبه
جا هسه ابعدن لو ساجدنه أبليس
مشكلة السفيه ايجلب بذنبه