زياد البصراوي

غمضت عيني جذب لمّن اجيت
وِلو مو هينة الجفن من ينطبگ
وآنه أجيبلّك برد من جف شتآي
وانتَ حجيك يحرك بروحي حرگ
كلمة الحكَ تنحجي بوكت النزاع
وكلمة الباطل رجيجة وتنسحگ
فوك حيطان الجذب لا تبني بيت
آنه كوخي يخبل بحضن الصدگ
لا تغرّ الـجايلك بـــأحلى الكلام
وانتَ ما تعرف تسولف بالعشگ
مثل خلّك العوز بجفوف الـــفقير
هيجي جنت ويآك شايللك خلگ
ليش ترسم عالجرف وجهك ظلام
وهسه روجاتي يسحكَنك سحگ
جايلي ؟ وراسك ركع يم الحرام
توّه جرحي ارتاح ماريــــد انجرح
ريح صفرة وجاية من سموم أديك
وبابي سديتة وبعد مـــــــا ينفتح
جان ليلك موت وشموعي الحياة
اشورط الليل وتعافه اعله الصبح ؟!
وجنت أشوفك ماكو وارسملك خيال
وبس أمد أيدي اعله ظلك تنمسح
وآنتَ يم جرحي الملح خليته ليش ؟
الــجرح يغتــاظ لـــو شـــاف الملـح
لا تذب ثـــوب الــعهر يـــم الـــحياء
نكَـطة السودة الـ بــالأبيض تنفضح
ولا تــخلي عــيونك بــوجه الجبير
شجاب سجين الغدر يم الـــرمح .؟
أنتَ رگبة تخاف من طاري السيوف
شجابك وحطيت يم سيف الـــذبح
أمنت جرحي الشرب همك عذاب
وبرخص روحك گمت بعت الـــجرح
تريد أذكرك؟ خنجرك بعدة بگفآي
حتى لو شلته الأثر مــا ينشلـــع
لا يغـــّرك طــولك امبـــين گصــير
ولا تصيح بصوتـــــــك الما ينسمع
شيل شوكك آنه بستاني نضيف
الشوكة يم بيت الــورد ما تنزرع
شمسي بيدي وماتوسلت بنهار
وانتَ ليلك شبع ذلة من الشمع
گتلك اتجنبني لازم بيدي سيف
بس شسويلك طفل مـــا تقتنع
لا تگلي اجرعهه وتعيد الــكلام
اعذرني طعنات الغدر ما تنجرع