باسم الخاقاني

أفسر وحشتك لو وحشة الليل
لوما وحشتك جا ما سهرته
جرح ينده جرح لو لانامت الناس
واظمه بخنجرجك وانه الندهته
وامتد والعيون اظنونها اكصار
وخوه جفني وبقت نومه بحسرته
تذكرني النجوم بعد الجروح
وخلصت النجوم وبعدك انته
وغبش بيه الفجر وانه اعله طاريك
وبعد جرح الموادع ماحسبته
اسمك على الشمس خَطيته تذكار
لو ادري بمغيبك ما كتبته
انا خلافك مكَابر شايله الروح
وبس ترجع يرد حي الدفنته
اقرب للسهر سميتك العين
ونزلت ويه الدمع حد مامسحته
بظهر دمعي شفت لجفوفك اثار
وكف دمعي وكمت بيدك دفعته
سها كلبي وكطع سالفته وياك
صفن لمن دره بطيفك ذكرته
سجاجين اصبحن جانن حمامات
احلامك وبجرح عشهن رهنته
اصورك والدموع يسولفن بيك
مثل عينك صورك تحجي سكته
الكلب بعده جمر ماصاير ارماد
شجاك استعجلت كمت ونفخته
نخيت أعليك بلكي يردك الشوكَـ
وجفن العاشكَكـَ تمسح دمعته
عساك بدمع يشبه دمعي بجفاك
وعساك بكـَلب يشبه من كسرته