حيدر الشكري

ماكلك اني وفي بس ركز بنيتي
باوع بنيت عشك تلكه الحمام اليمر يتعثر بطيبتي
عالباب عيني عمر والباب مني استحت
دارت وجها ومشت جي طولت وكفتي
بيا كلمه اصيحك بعد واسمك حفر شفتي
مابالغ بكل حجي من ضيم بعدك طلع
شيب بشعر كلمتي
من ضيعت صورتك حتى المشاعر عمت
وظلمه اصبحت دنيتي
للضيم كلشي صرت ساحة قتال اصبحت
وسيوف شال الهوى ويبارز بريتي
بشفافي مات الحجي واحفر ابوجهي جذب
يطلع كبر بسمتي
دولة حياتي حرب فوضة دمع عالوجن
قانون ردتك تجي وتكسر خشم فوضتي
بيه الفرح ماصرخ من شاف حلك الحزن
ياكل ثمر وجنتي
هيجي اني ويه العشك كلب الشماته
انكسر لمن عرف قصتي
ومن بعد ذاك الوفه وذاك الضوه والدفه
بيدك طفت شمعتي
سجين طبعك طلع كصيت راس الوفه
همزين عقلي انتفض ماسلمت ركبتي
سنك وسن المشط اهنانه تلكه الفرق
سنك كناري وضحك وسن المشط
يستحي ويتعثر بكذلتي
حبيت اقلد السمج وامشي بلايه جدم
حتى ويه كلمن غدر ماتنحسب خطوتي
ابصفناتي لمن تجي
من الباب اطردك رحت واكطع درب صفنتي