فاضل عبد الساده

ابغيرة من تلوذ ابعسر الأيام
إذا چان الأخو مابيه غيرة
واذا نهاشتك بالشدة الأرحام
وجهك وين من توگع تديره
وكت خلى الوره بهاليوم گدام
وحط الزين بالعين الزغيره
يگولون الأخو لظهر الاخو حزام
وانا حزامي طلع مگروض سيره
يحب ايشوفني أوطى من الأجدام
وأدور نوال من ذاته الحقيره
وأنه جبت العمر مادنكت هام
وخشم سمره بالأيام العسيره
قنوع وجبت عمري صيام بصيام
و وكت الجوع أحس بصبري شيره
علي كافي ضعت عشره من الأعوام
ديرة غرب تكطفني اعله ديره
شفت بيهن مرار وهضم وآلام
أبد ماشافهن يوسف ابّيره
وإذا فد ذيب مر يوسف بالأوهام
صورة وصوت أنا ذيابي جثيره
وكت مغرب واجنلي بجوع صيام
شوكلهن حرت بالروح حيره
كلن لحمي وبقيت ابطرگ العضام
أحشم من وانا بنص الجزيره
هضيمه الچان غالي ابرخص ينسام
وهضيمه يسوم بيه الأكل خيره
شبجها الوكت وافرگ حام عن سام
وأخو صار لأخو يحفر حفيره
يحزني الحار مثل دموع الأيتام
عمر والروح بچفوفك أسيره
حزن زينب حزنها بديرة الشام
بعد حامي الضعون الكله غيره
ابصبر ومكابر المحكوم باعدام
تعيش وهاي ليلتها الأخيره