سلوان المحمداوي
مذنب بس ذكر طرواك يشفيني
وأدور صوت من وادم .. تدور صوت
بلكت ( زاير اتفضل ) تدليني
وأنه إبچم عام وي ذني اليخجل ابليس
نسيت الله وعفت ديني …
ابيتي وتيهت قبلتنه .. وأتوضاك
والهج بسمك الحد ما درت عيني
ولگيت الكعبه گدامي .. تگلي بهمس يوليدي
ولگيت الرب يناغيني .. ويحاجيني
ينبي وشيبتي باب الله كله إمراد
اريد بهاي ترضيني
انتبهله وبالي مو يمه .. وأگله تهون
و أوگف مستحي .. وخطواتي تمشيني
واجيتك وآني ذنبي بگد حزن يعگوب
واذكر سجنك .. وإلهامي يبجيني
يا موسى وغلات ابنك وصبرك ذاك
أغلط بس وﻻ مخلوق يعفيني
واريد انخاك …..
كون الگه المشه وياي ذاك العام
ولو نص من شبه وجهه تراويني
أنه مشتاگله وزوراك انت هواي
جنت منتظره يرثيني …
رثيته وكبر همي وضيعت ملگاہ
وصاحبت الموادع لليلاگيني
وبعد عندي حچي بگد ما مشو زوار
الك يا باب نور بضلمة سنيني
ولكن .. اخجل امن الناس ﻻ يدرون
ذنوبي امسودنه .. وعقلت سواديني
اعتذرلك .. ما رثيتك ولو هذا الهام
اجاني وانت كلش زين تدريني
اجيك .. وكلشي اگلك يا حنين الروح
امن اكض شباچك .. واكشف وجه .. طيني
