علي الملا الخزاعي
السجنوك بحياتك ياشمس بغداد
احتلوا ديرتك بس غمضت عينك
والسموك ردوا بالدرع مولاي
والكطعوا جبدتك كطعوا دينك
والعافوك مرمي اعله الجسر مولاي
ردوا عالجسر مسحوا نياشينك
وصوتك يبقى صوتك خلده التاريخ
ونولدت امس ماماتن اسنينك
ياباب الكرم يابيدر الطيبات
اكعد كسروهن كل فناجينك
ياباب الحوائج تقبل انته اشلون
بغداد الحبيبه اتصير محتله
وانته ابن الحسين المايهاب الموت
منهجكم كتب هيهات للذله
ذبحوا شيعتك ياكعبة الاحرار
وحاطوا كبتك يالكبتك قبله
تيهنه الدرب ماعدنه ظل مقياس
بس درب المكابر كمنه نندله
كتالك رجع شايل حقد تاريخ
ولد هارون اجت وطلبك بعتبه
والثار اعله مودك سكتاه الكال
موجود الاله ويحرس الكعبه
ومتانين يفزع للبلد مختار
ولو ادري الخوارج مذنب اتحسبه
ردت كلهه ردت سيدي العادوك
ردت عالمنابر حيدر تسبه
نشيعك مونعش تشيعك بكل يوم
لان يوميه الف تشييع من ناسك
يالساسك نبي ومتفرع المعصوم
ياهو العنده زود ويوصل الساسك
ياجنة عدن يالتخدمك املاك
وملائكة العرش مولاي حراسك
طلبه انريد منك تفزع البغداد
وتجي بفقار ابوك ودرعك وطاسك
لان ذبحوا عراقك مثل ذبح احسين
اخذ ثار العراق وثار عباسك
