جودت ابو فرات
ما لكيتج
من اجيتج ضامي شوك
او خنجر الشمات فحطه
و انتي ماي
و ردت تسكيني ابكثر ماني سكيتج
ما لكيتج…
و من اجيتج بيه حيره
حيرة اطفال ابهدم
ليلة العيد
ابكل هدم يصفنله ساعه ايكدره مره
وصاح هوه وخاف ميبين جديد
اومن اجيتج بيه لهفه اكبر من اللهفه عند العاشقين
لهفة ام لوحيدها الجاين سجين
اومن اجيتج شفت بابج راسم اعله العتبه دمعه… دمعة المكسور خاطر
طايح او عافوه ربعه..
دمعة الام الحزينه الفكدت ابفد يوم سبعه
هذا بابج هيج حاله
اشلون بيه اني الهويتج؟؟
من اجيتج
مالكيتج
بس لكيت ادموع بابج
تصرخ ابكل حركه ردي
اوسورج العفتيه طاح
اوينحب اومحتاج ملكه …
ايصيح ردي
الشارع البي جنه نمشي
ايصيح ردي.. العاقل المجنون كلبي…
ايصيح ردي
واني من شدت لهفتي اعليج
احس الناس كلها اتصيح
ردي.. ردي دونج كلبي كثرن نايباته
ردي دونج همي اجاني ابكل صفاته
ردي ليه اخدودي موت
او دمعي كله اعلن وفاته
ردي لتزودين دمعي .. ردي لتطلعين دمعي
دمعي والد صعبه
لو طلعن بناته
ردي مولازم محبه
ردي مو لازم غرام
امبارك انسكت الشماته
