سيف الحلفي
دموعي وكحة وشرعت باب العيون
وانه شمعة ومن كثر دمعي انطفيت
مازغرت بعين روحك من رحت
شلون كلبك طاوعك ضدي ومشيت
رد اليه بداعة المني خذاك
ماأحلفك بيه ادري اني انسيت
وانه بيه جروح اسمهه الكبرياء
الشكوه لله وحتى لله ماشكيت
اهواي اجوني من غركت كالوا تعال
ردت امد اجفوفي لكني استحيت
ابيش قصرت وعفتني بلا وداع
جنت اعد حروف حجيك لوحجيت
ابلون جنحان النوارس شعري صار
واني مااكلك متت بس انتهيت
بيه الك حنية اعمه يحن يشوف
صورة امه كباله يسمر مادريت
وانت تدري الشاعر يهزه الحنين
ويعلم الله بهالقصيدة شكد بجيت
اذني عطشانة اعلى صوتك من زمان
ومن شفافك ياترف كلمة اشتهيت
دورت كلبك شفت مالي مكان
وين وعدك موكلت بانيلي بيت
جنت اكول راح من ملكاك اخجل
وخجلتني بكلمة اشعندك اجيت
لاتسد بيبان كلبك عالغريب
اني راجع من عساني مااجيت
