للراحل: صاحب الضويري 

ياحبيّب لو رِدت باجر تشيل
وماتصيرش بَس نكول إحنه ولّو
جنِت احشم كل عمامي عله الرحيل
ومايهمني اللّي إجوّا والمااجّو
********
ياحبيّب لو ﮔلتْ آنه زعلانْ
ﭽازعلتْ عله الهِوه لو زَعلاكْ
وما يمر بريتي وذاك المـﭽـانْ
اللي ﮔبلْ ماشِمْ هواه أشتمْ هِواكْ
وﭽفي لِكطه الكاك بدروُب الزمانْ
وكيفّيت إبين ضلعَين ازرعاكْ
الدنيه مَدري شلوُن فُرشتلي الشليل
وفرهِدِيتكْ يوُم عذالي التهّو
وآنه جِبت الغانِمه وآنه الدليل
ﭽوّرت وأهل الهَوه ما حَصّلو
********
تعَلـﮕوّ يَرفاكتي بالطيّباتْ
وخلوّ إدروب الرِدَه لَهل الرِده
اليباتْ عله الهَضُم خلّه يباتْ
الغِيره مُهره وماتظل محدّده
دُوك دير إعنانها علّه النايباتْ
وفوت ﮔوه علّه الخَطر وتعمِدّه
هاي هِيه ومن تـﮕـع بيهَه ﭽتيل
هاي هِيه وصير للرّحه لهوّ
ﭽفةْ الميزان تثكل بالثجيل
وهاي دِنيه ومو شَرِط بيهَه العِلوّْ
********
إي وحـﮕك وانته أعز من اليمين
ولو حَلِفت بَغَير ماﮔتلَك جذوب
آنه وانته وما علّي بالعالمين
الشرِﮔت والغرّبت بينه الدروُب
وهَسّه عَتني الشوككْ يَمك والحنين
إستاحَشِت ﭽـي وحدّي وكت الغرُوب
كون يَمك ﭽـاصحِتْ عِندَكْ دخيل
دولبني أيام هجرانك شسّو
وانته تدري بمهجتك(صاحب) نزيل
وخاف غيري بالنزل بويه إدعّو
********
مِنْ زمان دياركم تشـﭽـي الظلامْ
وهَل نثِرنه إعيوننه عليهَه نجُومْ
وانته تدري اطباعنه اطباع الحمامْ
مِنْ يتيهْ يظلْ عله دياره يحُوم
وهَاالدِوَت بكتاركم نار الغرام
وما يطفيّها وعلي مَلكْ الغيُوم
بَسْ رِضابَك ياحلو مِثل الجحيل
لنار ﮔلبي كون موﮔد اوﮔدّو
وآنه أحبَنْ بيك كلْ ماهو جميل
وما علينه بالحـﭽو والماحـﭽو
********
ياشريج الرُوح خَلهُم شيحـﭽون
وما علينه بالعَرف روحَه نشِيط
ولو درَوواللّه باﭽرْ ينتهون
صاحو بغربانهم ييزي النغيِط
وآنه ماريدَك تفكْ عَني الديوُن
ولا أريدك لو ﮔرب مُوتي محيطْ
آنه موتك ضايـﮕـه وﭽن سَلسَبيل
ومِنْ منايه الخالجَكْ شارب حسّو
عَيب أذل وداعتك واصبح ذليل
يومْ أشوفن بالنزِل غيَري ادعوّ
عاد أحشمْ كل عمامي علَه الرحيل
وما يهمني اللي إجوّ والما إجو