علي طالب
هاك اخذ جرحك بعد ما أشتهيك
وكلمة آنه اهواك لاتحجيها
جنت أضنك صوره ما مرت خيال
وكتشفتك عاذل الحاجيها
أنجوم جرحك صح خذت حيّز سماي
ابشمس باجركلها راح أمحيها
ولا تظن ادموعي تنزل لو مشيت
الدمعه (أمي) اشلون أفرط بيها
و رورح صفناتي الكَبل جانت عليك
ذكرياتك كلها راح ارثيها
وعيني لو تشتاكَلك أقسم يمين
و شيلة امي ابصم سهر وعميها
و لو نجره اعيوني ميّزت كلشي بيك
مو هذيج البالشمس رجليها
آنه كَاطعلك عهد وياك اعيش
ورود عمري شبيك تكَطع بيها ؟
جدم هجرانك ضحك شامت بناه
وآنه احلامك شعر بانيها
أشجار ضحكاتك علن وآنه الخريف
بس أهبن ما يظل شَيْ بيها
وبس أوخر عنك اسنينك تطّيح
اسنين عمرك عمري لمتجيها!
ابكَاع خدينك أنه العاكس ضواي
بمعنى آخر آنه لمحليها
ذكرياتك صارن الطف و يزيد
حيل اكرهك من يمر طاريها
