احمد الهلالي

مو كلمن حجى معناها موجود
ولا كلمن سكت يعني انتهى وضاع
يسفان البحر بس يصفن يهيج
وما تلحك اكباله تنزل شراع
وخل نفسك تفرق بين الاثنين
فرق بين الذيابه وبين الاضباع..
الضبع لو جاع ياكل فضلة الذيب
واكل الذيب بس ذبح ايده لو جاع
وفرق بين الترك حكه بالحلوك
وبين الياخذه من حلك الاسباع
والياخذ حصته وما بيها نقصان
مو مثل الخذاها انصاف وارباع
واعرف زين نفسك انته يا نوع
مختلفه الطيور اشكال وانواع
خل ريشك يدج وبراحتك طير
اليعله ابساع صدك يوكع بساع
وترى اليعله اعلى غيره بلايه جنحان
توجع طيحته لو طاح عالكاع
وحط عالكاع جدمك بعد وين تريد
الغيم اشما علا للكاع تاليته
ولا تنسى الحجم كل ما كبر ينلاح
ومن يعلى المتن مايعله خاجيته
انته الظامه بين بشوف العين
ومحد شايفه بس عيني قاريته
نسيت بيوم سرك من صرتلك بير
وهلت روحي اعلى روحي وكمت طميته
يالشلتك بكلبي لاتدوس اعليه
تفكد رقته وتموت حنيته
انا كلبي جعلته ورقه بيضه اوياك
وشخصك كلمة سوده بكلبي خطيته
احس مو صافي بالك من مشيت اوياي
وكتلك موش صافي وكلت صفيته
وعركت كصتك والماي خابط جان
وبين موش صافي وكمت بديته
وصحت بوجهك اوكف لاتذب الماي
هذا ماي وجهك ليش ذبيته؟؟؟
ومن ماشيت جدمك جدم مابي صوت
وبي نكلة خيانة وغدر حسيته
ولهذا السبب كضيت جدمي اوياك
كضت مستحه … موخوف كضيته
انا المثلك زحف للشط اخذته اوياي
وبعز الشته وعطشان رديته
بس احتار يمك شرد اوصف بيك
غدرك حيرتك جدمك الماشيته
انا كلما اكلبك بيك ارى وجهين
وجهك وبكفاك الثاني ظميته
وانا صاحب وجه
بس يمتلك طبعين
نص للطيب بس…..
وللمزامط نص….
ياناكر العشره بين المظمون
وبين نص كلامك علي من تنص
انا موكلب سمجه لاتلف وياي
وتشمرلي العجينه وحاط بيها الشص
انا قناص كلبي يفرزن الشاهين والحر
واليريده يجيبه من يكنص
اعرفك من فحيحك من تفح بالليل
وادري بلا جدام وتنطوي وتكرص
اناشوفي بعيد وعيني عين الذيب
من تغفه وتنام تنام نص ونص….
ومن شفتك عرفتك كلشي ناكص بيك
فقط بس الخيانة تزود ما تنكص
وحية تبينت من مركصاك الناي
لان طبع البشر عالناي مايركص