زمان الكريطي

اصحابي عكبك هلهلو من رحت
واتخيل الشمات يعني اشحجو
ماكتلي رايح علاقل جاكلت
حتى احسب احساب العذر لو اجو
ماعندي واهس وكفه بس ماطحت
من كد وكفتي اصنام الي صفكو
سالوني عنك كلت هسه يجي
وكالولي بلكت لكن اتنادسو
يابلبل الشجره اشعجب شو صرت
خفاش ليل وعالشجر ماتحط
تحركني رايد قابل استقبلك
يله تعال اعله اسمي حطلك شخط
محضر العود وحطب عندي اشكثر
لتجيب كلشي وياك غير النفط
وحركني حتى ارتاح من فركتك
بس كبل لا تحركني عندي شرط
تدفني كون ابيتكم لو متت
حته اعله كبري ادوس جمله وفرط
ولزم الشجره البالحديقه العصر
حتى الزم السباح بيك اتصل
وانشد وكلك ها اجاك الندم
بعدك تقييم البشر من الشكل
ها بعدك اعله الورد تحمل حقد
بعدك ابكل السنه متحب فصل
اني بغيابك صح شفت ماشفت
وعانيت يامه وهدل متني الحمل
بس عندي عزة نفس تسوا النفس
وطولت خلكي وياك بس ما اذل
وكل هذا منك ما كطعت الامل
سالوني يرجع كلت يرجع جلد
الحد ما اجاني الشيب واتعكزت
وضليت عنك ماكطعت النشد
وكامت الناس اتكلي بسك بعد
الراح منك بعد ما ينوجد
وعصر اعيوني وكوه ارجع الدمع
وضحك وكلهم ذاك اجاني الورد
ادري اشيريد ايصير هوه كلب
شاعر وعاشك فوك هم البعد
يا ايوهل مبتعد لازم تجي
برحيه روحي لو طحت تنمرد
مو شرط يمي اتنام وتلمسك
لا بس اشوفك مر ولو بالعكد