مهند صاحب الربيعي
شيفرق عذاب الكبر
عن فركتك من رحت
صدكني نفس الالم
بس بغيابك زمن
تمنيت اعيش بكبر
بصفناتي موت شكثر
كل ذكرى منك عمر
واتخيل شكد متت
الشمس من تختفي
يموت كل الورد
وانه بغيابك قسم
شمس أو ورد شيعت
ماظل فجر انطره
ولاعيد اصوم ويهل
كلشي بغيابك رحل
حتى الامل مابقى
كاتلني واشتاك الك
جائز بعدني عدل
ارجع الي عالاقل
دليني بالمشنقه
كلشي بغيابك مضى
حتى الصور غوشت
من عيني ماشافتك
اتوقعتهه عمت
يالعشرتك
جن حلم
ليلك يمرني قهر
ولاشي يبشر بفجر
جرحك اكلني اكل
لوصدفه اسمك يمر
من كل كتر انلجم
شيفرق عذاب الكبر
الفرق كلش سهل
الموت حق عالبشر
بس فركتك باطل
ارجعلي احس بغبن
من فاركتني ورحت
طيفك وعدني بعرس
اشون اقتنع راحل
صيف وشتا بداخلي
متناقضه جروحي
والموت بعدك شبح
كل لحظه بيهه احتضر
تتذكرك روحي
وحياتك تحملت
كل اللسن وانطرك
ويصعد براسي العشك
وابتهل نار وبرد
محتاجلك بس ترد
الصحرا ترجع ورد
والشمس ترجع شمس
محتاجلك مامتت
طيفك وعدني بعرس
محتاجلك صرختي
مشتاقه تسمع همس
واخ شكثر منجرح
من يوم ماسافرت
شيفرق عذاب الكبر
عن فركتك من رحت
صدكني نفس الالم
