عبد الكريم القصاب

يراوي العود ، يمعسل ،
يمدري بيا وهج تضوي ،…..
وعلى النسمه ايتماوج ضيك امدلل .
مذعوره النجوم ، اتخاف لاتطفه ،
تجي وتحط على اعيونك ،…
ذليله وبيك تتوسل .
يهلبت جدحه من عينك ،
توج بكل نجم مشعل .
يكمره وكل رمش شمعه ، …
وضواها اخصور تتفتل ،
يمضوي وبس علي مطفي ،
شجاك وغمضن اعيونك ؟
ونا ابسجه عمى ماشي ،
مشي بضيجة نفس وبدوخة المغزل ،
واريد الكاك ، ما أندل
وانت ولايحن كلبك ولا تسأل.
برد ليل الهوه الدافي ،
ونجمتي ابغيمه تتعلل .
شجاك ؟ اشميلك عني ؟
جنت من الشعاع اعدل
يشوك البارحه اليجوي ، البرد كلش ،
ولا يسأل .
ولا نشغة جروحي اتفزز ادموعـــك !؟
ولا صفنه التكظك فوك الوســــاده ،….
وتشوف اغيار وجهي اكبالك وتخجل !؟
يهلبت تستحي وتسأل.
حزن بالروح ،
أغمك من صفنتي اعليك ،
واطول من خلك ميت ، ولاتسأل .
حزن ……
مالي عرف بي كبلما اشوفك ، يالمدلل .
حزن ضحكه وحزن شبكـه ،
حزن مامش وراه ملكــــه ،
حزن مديوف بالحركــــــه ،
ومثل لون الكحل دمي عليك ……..
وجرحي امكحل ،
وانت ولا اجي ابالـــك ولا تسأل .
يغاوي بيا عطور امطيب ازلوفــك ،
وانا فوك الجمر للفاجعه امهدل ؟
مكطوعه الحراثي وشهكتي اتفرفح ،
مثل طيره ومتربة شوف ، ما تندل ،
يهلبت تستحي وتسأل .
يراوي اهناك ومعسل ،
عكدتي امدوهنه ……
وناكوط صوتك موش يم الحل .
شجاك ؟ اشبرد انفاسك ؟
ولا لهفه ؟
ولا جلمة عشك ترفه ،
ولا من جذب تتغزل ، ولا تسأل .
يتالي المو على بالي ،
اشحلاتك جنت بالأول !!!!!
جنت معسول من ترضى ،
وجنت كلش لذيذ اوياي من تزعل .
يراوي العود يمعسل ،
اشحلاتك جنت بالأول !!!!!
يريت اتعـــود للأول .