عدي فريد

مرات اشوفك ضوه..
مرات اشوفك ليل
ومرات اشوفك وفه
وتشد بكايه الحيل
يمعذب ارويحتي..
بسك عليها تعيل
اعرف تشمني جرح..
بس آنه كل ما كبر
ليلي أشوفك صبح
والكلب كلش وفي..
كل ما اشوفه نسه
 يرجع يحن للملح
اشكد كعدنه .. سوه
وشكد حجيبنه سوه
وشكد بجينه سوه
وكتلك ولك تنسي ..
عشرتنه كاع وفلح
وانت الهوه ما خذك..
يلعب بشعرك لعب
والكذله جنها جنج
بالريح تلعب فرح
والريح لمن تهب
تاخذ وياها الاخف..
والاخف يعني الجذب
واليبقه يعني الصدك..
الفلاح مابي ذنب..
بس كاعك انت حطب..
والنار كلش دوت..
ها تكب ها ما تكب
طفيتها بدمعتي..
وتعرف بعد دمعتي..
شايفها لمن تهل..
كدامك اشكد مشت..
واشكد عمرها يذل
وكتلي تمل .. يا حلو ..
وكتلك وحق الهوه
البيناتنه ما أمل.
ومليت..وانت السبب..
مغرور تلعب علي..
ما تعرف ارويحتي..
وك مني ما ينزعل