ازهر كريم

لا تايه……. ولا اكدر
اليلم عطر الورد ينجاس بي عنبر
اليشم طعم الهوة بريتة
يفز طير بهوة الله الماخجل يفتر
وانا بليلي وضنوني
سهرت انطر صبح خدران
حسبالي النده يخضر
وحسبالي اليشم اغنا
يفز نخلة اعلة كاعة سنين
وانا ابين هذا وبين
أحسبلي سنة بلحظات
وانتي بصفنتي تشمين
ماتدرين فزعت الكصب عطشان مامر اعلة وشلة ماي ينشد كاعة عن دربج
وحشمت السنين الطشرتهة حروف
مالمت ثوانيج
يفلانة نشف حته النجم لونة وتبين للشمس تابوت
اطش فوك الشرايع لون بلكت بيه اشوفنج
واسولفلج يبت الجرف حسبيلي
منو الما ذلته عيونة
ونثر شوفة اعلة كل نجمة
منو المايعثربصوتج
عثر اول نبي بجلمة
اغفريلي
الرهن عمرة بزلف
مايفظ من اسمة
الشرب حلم النهر ماتبقة بي ذمة
كليلي شني اليشتمة دربج حتة اصيرن غيم
مديوره النذور عليج
مبخوتة الكناطر ماينت جرفين
كوديلي الهوه بعرفج
سماي بغيبتج حسبة
وزفي اسمج نذر حنة الندة
متاعة اعلة كل وركه
الفجر من كامت النخلة
يعزبلة بخصر ورده
وانا جتف النهر جتفي
رخي وشايل كناطر والوكت حمليل
خلص شوفي وشهكت الصبر سالوفة
تخاف الله يالمكابر جهبة الليل ما اعرف شني دروبة
ثواني الكمر ترتاح بظلام اسمي وتعيرني الشمس ظلمة
تعبت هواي
بمتة العيد وجناحة يصير اعلة الورد جبريل
تره اليشتم عشك مفضوح ماتخلص مواعيده ترة وجه النهر مملوح لو زادن تجاعيده
وانا ابينهن تابوت
اضل الحد ضوة بلا ناس
يانادل بعرفج زين دليني
الخمر شط بزواية اسمي
يزكيني السمار شموس
والكاس اليرويني
يبعد اسمي
اوادد بالنهار خدود
واتعبد بقايا الفيض
ماهمني الحجي الينكال
اقدم المستحة الموجود
ولا لم الضنون اوهام
ولا اشيل الحجي المكيود
اطش بكربج اولايات
وانتي اختاري سالفتج
واعذريني اذا قصر جرف وياج
ترة الكيعان ناطرتج.