حمزه حسين مطر

رديتلكم شايل فرحه
 بكد ما شايل هم من عدكم
رديتلكم وادري بعمري
 اتكسر مثل الجامه بحبكم
رديت وجايب ضحكاتي
 ارد اوكف وابجيهن يمكم
يل عفتوني ولسه هدومي
 من افركهن تطلع ريحتكم
صح ماعندي وياكم صوره
 بس مرات من اشتاكلكم
بس الزك كلبي اعلة الحايط
 تطلع عالحايط صورتكم
هوه انه شدلاني عليكم
 وكلبي شدلاه وشجابه الكم
بس الحب مهره وشالتنه
 ومن عثرت طحنه بعتبتكم
وبس شكد خيبتوا ضنوني
 من جربت وردت انخلكم
بعده المنخل ما هزيته
 من المنخل طاحت عشرتكم
هاي سنين من اتوادعنه
 يمته تردون مروتكم
مو صار تراب اعلة جروحي
 ومحد ينفضهن بس انتم
ودارت بينه ولمن دارت
 وجابتنه الصدفه لشارعكم
ولن واحد ميعرف الثاني
 وجن ما شفتوني وشايفكم
كت خل ارجع وانزع وجهي
 بلكي من انزع وجهي اعرفكم
وانه وياكم صح ما احجي
 وزعلانين وما اوصلكم
لكن لو فتم من يمي
 يركض ضلي ويشبك ضلكم
لا يحبابي ولتبجوني
 ما ريد انه ابجي لخاطركم
ضلت اخر دمعه بعيني
 وبس ابجيهه اطيح بخدكم