قاسم الجيزاني

غركت من كثر ما بيها صعدت ناس
اكبال عيونة ويخوف المشهد
صعدهم شلع ماغربلاهم زين
والربان ما يدري جزر لو مد
ضرنة الهم هوة وهبينة للحب ريح
غشمة شراعهم ضد الهوى تمرد
بعدهي اثار ايدينة بالبحر نيشان
الروج شما علة جف الوفة يمتد
الموشغلة السباحة شلون طب للماي
وعلى بصمات ايدينة ايريد يتخلد
السلاحة ورق اصل المعارك نار
باجر وين ينطي الوجه من تشتد
الراعي الناي الة تطونة مبرد ليش
اليسرح بالغنم شيسوي بالمبرد
تعبت والزلم ما وصلت بيومين
بس عشرة صفينة وكبل جنة شكد
اكو ناس بحجيهة اذب علينة احجار
ومن كثر المكاطف صار حل وشد
شبي بلبل هلي ماسامعة من العام
من طيحت عطا لليوم ما غرد
يبجي اعلة الجذع مابي رطب ويطيح
ولا مريم تهزة ولا نبي يولد
ولا كان صبيا بالمهد ويكول
هاي امي شريفة ويسكت المعبد
اليصعد للسمة موشرط عندة جناح
ولا كلمن يموت ايصيرلة المرقد
الما شايل صليب اعلة الجتاف
وياه لو كلة يصير جناح ما يصعد
انصلبنة جم سنة وجم سنة احنة انوح
وامنة بقضية وعنها ما نرتد
حركنة ارواحنا من شفنة الازرك جاي
لان جرو غطا ها وخفنة لاتبرد
يل لازم المرود كحل العنيين
لاتلتهي بوحدة الثانية ترمد