كاعك يا وطن
محمد سلمان
من سنين احنا تحزمينه اعلى الموت
شبان لجلك يا وطن ما نحلم
نزاعل ونتصالح بجية التابوت
جتف بجتف جوه الجنايز نلتم
فزعنا شوف البينا يركض هادود
واحدنا تلكاه بعلم يتحزم
والساتر بوكت الحرب عثره يصير
ورجال عندك من تهد ما تهتم
لبراسه غيره بهدته يسرفن روح
يا فشلة المو كدهه ما يتحشم
انا من ادكن صدري ازاعل لزلوف
تربات ابوي وعالحرب متعلم
وارجف رجف شياب من الكه عداي
خايف أنه ابرد يمه لو مر سلم
ويختاص سيفي بعينه ضيج الكراب
اچوي ويبرد اله بحرورت دم
وبروحي انصب جادر اعلة الميتين
خاطر الكصبه الهور هم يتلثم
وما اطفي ناري وبالكرم عندي اخلاق
والضيف من اطباعي ظل يتعلم
من انكت عباتي الناس توكع جواي
وبكصتي گطره اعدال عندي بزمزم
المات والعايش يحبونك ليش
حاجيني سرك فدوة رايد افهم
كلك ترافه وتارس الكاع كبور
والزلمه لو وجهين شايل ينذم
مرات اعوفك وارجع الفشله وياي
الماحاب كاعك يا وطن ما يندم
