حسين الحبتري

 مال انخاك…
يل روحك رساله
وطاحت بجف ناس مايقرون
يل روحك تواريخ بصدر حايط
كتبه بضوجته المسجون
يل روحك سوالف داينته
لمعشر الخرسان ماينطوك
شفافك شيبة وشفافي
 انه حديثات من ياصوب
 احس وياك نشوة ضوك
الدله التنطرد من كمكم بنص
 ليل موبت شيخ ومفرعه
وتفضل عالحجاب الطوك……
مـــــــال انخاك
وانه ذكر كلتلك من
 سججهم مو لزوم تفوت
السمج من تدني نفسه
على العجينه يموت
لاتوصل بعد شيفيد….
شما يثكل حمل حطاب نار تزيد
تتعب لاتدور بيت بيه
 ايتام ضحكه وعيد…
مال انخاك…
يل ماتعرف الفركه..
الفركه وجه كاع النهر
مشتاكه للخدود السمه من زمان
ورحت ضميت سرك يم وجوه ثكال
ورسمته الهم رسم جي
 صدكت طرشان…
ورجعت النوب كمت تناقض
 بروحك تطش بأذنهم سرك
هذاك اليوم .. يوم تظاهرو عميان
وتناسية مايحمل ذنب
من يركص الفنجان
حيل وياك يبرالك الف شيطان …..
فهمت الكثره زايد خير
 يبنادم لجن مودوم
الاصبع من يزيد بجف يجيب اللوم
والشمات منه وبيه تتمنه
وتفرح لوشفاف الموس كصنه…
شموازيك…
ردِت مني الم خطواتي
البروحك لكيتك ماي
خطوه بماي وين الــــكه…
والعنكود عالمشلول يتبختر
يدري اجفوفه ماتكدر
وتضل بنفسه يستنكه
اضل لاوين اعلم بيك
لاتحجي بكحل لو عن
بياض خدود يم وجوه محتركه,,,
مال انخاك
يل كلك سوالف بيه طعم فراك
بشفاف الحضر
 كهوتنه ماتنضاك…. ياوسفه
بعتني بمدري بيش وجان عندي شكد
ماكتلي ..
واكلك دوم جنت انه هذني
 خطوطك البيدك
تجاعيد على وجهك لو لكلهن خد…
بعتني بمدري بيش
وجان عندي شكد
شموازيك …
يل صوبك بعيد ولاكناطر ليك
وخندق بينك وبيني
ولالكيلي كطرة ماي بيه اسبح
حتى اوصل وكلك هاك هالكلمات
مال انخاك تنساه ولو خايف
اخاف هناك من اوصل
تخضر بالحلك كلمة الميخالف
وتدنه جفوفي ع الشبكه
وفك ريجي بعسل شوفك
مااصبر تضل بلهاتي
دوم مرورة الفركه
وكلك ردلي جيت انخاك