محمد فليح العقابي
هد وياي ..
اريدنك تجي خيال يسمر مهرتك جلمه ..!
هد وياي ..
وعلك لليالي السود … بيدك ياترف نجمه ..!
وابجي عليك ..
شد حيله الدمع بعيوني امحزمه ..!
ومنو اليكدر .. ومنو اليكدر ..
يمد جفه على اعيونه وخنكَ حلمه !
هدي وياي..
احلم بيك صار سنين!
اريدنك تجي من اسماي!
اريدنك تجي من الماي .. نبي كَاعد بنص الحوت..!
ردلي شباك مني الموت
تعال بعاصفه .. ويالصوت .. ما اريدك تجي ابسكوت…
.تعال وفك حزن هلهوله مامرة على اشفافي ……….
اسود لابسه مسنين!!!
تعال الليله …واذبحلك فرح ما مر على السجين؟؟؟
نذر .. ناذر … امد عيوني بدروبك!
كَصيره عيوني بس متلوح
عيون اطفال سولتهه تجي وتروح
ما تدري شتريد اتكول يالجيتك عرس مذبوح
تعال …. من المكَابر راح الم اوجوه.. وابنيلك سفينة ونوح!!!
وخاف اتيه مد جفك خريطه بجتف اول لوح ..
ودفن خوفك الشايب !
قديم الخوف صار من اللبس بايد!
تعال وياي … ابجي وياي .. قست دمعي وطلع زايد
تعال وجيب بيدك خيط .. خيط انعاسك البارد !!
تعال عيوني سويهن كَلايد!!!!
جفوفي تقراهن جرايد!!!
وشكهن بأول عمود ..
الماوصف بعدك جريمه!!
وروحي من بعدك يتيمه
وانت بيدك ..
اذبح افكاري على القبله القديمه ياحلم مقفول بابه .. وزنجرة رزته الدمع
وياعيونك عزلوهه .. وختموا الشوف بشمع
…. غفله ما ندري واجو باليل الازرك ….
فوك صدرك موتو كل الزرع
وكوه رادوا تحجي عني
وكسرو بشفتك ضلع؟؟
وفتشو جيب الضمير
وما لكوا كَبر الربع ؟؟
وركضو ايذبحون صبرك
ما لكَو دم ابركَبته؟؟
دمه يابس؟؟
انه ماشايف ابد خياط مثلك
الدمعه فصلهه قميص
ودمعه لابس؟؟
الخطوط الفوك جفك
بالعرض والطول كَاع
والكمر من كَد حلاته
فوك خدك امس ماع
انه احبن بيك كلشي
ولو كلشي منيدي ظاع
كون بيدك .. شكهه بيدك
من امس كلمة وداع
وداع
