اعثر بالفجر
علي رياض/ بغداد
اليمته اشتاگلك والزم سره اعله الطيف
واعثر بالفجر عثرة ضوه بسرداب
الميت بالسجن مامره ملج الموت
طيف المر عليه كاعد بنص احباب
مثل خنكة كمر بالفجر ينطي الوان
خانگني النفس لمن يمر طلاب
كل نسمه التمر عالشمعه ملچ الموت
يعقوب ويمره النفس طاري ذياب
اعثر بالهوه لمن يمر طاريك
واطيحن وانسئل والچلمه ماتنجاب
دخان الحطب عثرة جدم عصفور
عصفور الوكع مرات ما منصاب
البوجهك صفن يحضن صليب كفاه
مايرمش لون تترس عيونه تراب
منصفن بالصور اعمه وصفن بالصوت
شايب ظهره قوس ومره ذاك الشاب
واذب حسرة بشرط توصل خشم غركان
حسرة شاعر اخرس ريته كلهه اعتاب
تره دمع النهر روجه اعله خد الكاع
انه مطيح نهر وي روجته التنهاب
صحت محتاج لك فزعت هوسة شيب
عمره ورده وكمت التقي بنص شياب
تره اليكطع ورد يفصل الكاع غيوم
كل كطرة نده اتطيح ابوجهه نگاب
انه الشايل كلب جتال اخوي ارثي
يرهم للتحج لمن ترد حجاب
لان ابيض كلب وركاب يهوه السيف
نومت النحر عثرة اعله باب كراب
بقه لجفك اثر عالباب ما ممسوح
من اشتاگلك احضن بوجه الباب
