للراحل/فاضل عبد الساده
خلوني بوكفتي احسن الــكم
جبل لوطحت تنطمون جواي
لاتحفرون ساسي بمعاولـكم
والشينات لتــسوونها ويـاي
الف وكفه شرف واكف لاجلكم
بفرحكم وبحزنكم تجوه وفيـاي
شتعضون البقى بس جلد وعضام
تتكــسر بعضمي ســـــنونكم هاي
انه موش ابن شـارع لا ابن ناس
بس العوز وصـل حالتي لـــــهاي
وانه صاحب الصاحب ما بعت يوم
خســرت بكل حلالي ومال دنــــياي
شلــــك بالنفاق ومـــنه شتـــريد
يـــطول شاربك بسوايـــــــتك هاي
الشاعر كون مرهف يمطر احساس
مونقمه وغضب للرايـــــــح وجاي
انه دمعت حزنكم من يجي الضــيم
وانه بلسم جرحكم من يجـي الداي
وانه همزة وصــــلكم من تطشون
وشملـــكم ابد ما يلـــتم بلياي
دخلوني بســــكتي لاتهـــــــيجون
جرح توه غفه وما صـارله هواي
الشعر يوكف بابي مدنك الراس
اطردنه ويردلي ردود عنــــــاي
صفنتي القافيه وحسراتي اوزان
وحزن كلبي القصايد عايشه وياي
من اكتهن تنترس بيهن دواوين
والف شاعر يسر باثر ممــشاي
انه الجفيـــت ياهو الكال جفيت
اجف كون الفرات يظل بلا ماي
