زيد السومري
بده حبنا احجايتين
وكبرن وصارن علاقه
وكمنا نخبطهن سوه عمري
ويه عمرك
فدوه دثرني بدفو احجاياتك
وخليني انعس
واغلب اهل الكهف بالنومه
اعلى صدرك
بعد صف وياي اريد اتباهه بيك
وارد اصم اليمنه اعلى يسره
وعلى اعناد اليرضى والمايرضى اجيك
احنه يالحتى بوكاحتنا ترافه
ضد مطر حجي
الشماته نلبس اثياب الحنين
وكاعدين اعلى الشريعه
وزخت الدنيا علينه وماطلعنه امبللين
احنه من نتلاكه روح اتلاكي روح
واحنه شفه حاطه العين اعلى شفه
ومن تحط ايدك بديه
المستحيل ايصير لعبه
وحتى هذا الماي ريحته
وطعمه نعرفه
كمنا من الكلشي
ماكو انسوي دنيه
نهوه ونغني ونعوف
بكل مكان انطبله بسمه
لوحسبنا اسنينه البالحب تعدت
مو سنه وسنتين نحسب
نسمه نسمه
يالعرفتك خير من
اتفاءلت بيك ولكيتك
صافي وتكطر محنه
القساوه ماتحصل
الها مكان ابوجهك اليمطر براءه
احلى مابينه التقينه
وماتمر ابالنه كلمة وداع
لا اسطبيتلك على سجه غريبه
ولادخل بيناتنه ساعي بريد
الندى متعود علينه
الصبح يلكانه سويه
انا وانته الماتفاركنه شبر والشوك
يضربنا مثل للمشه
وعاف خله يبتعد
عل جرف كعدتنا طالت
والنوارس منها غارت
واول اثنين انعزمنه
بعيد ميلاد الورد
