خلصت سنيني
صادق طلال/ بغداد
مدري ليش بكلشي قابل
الشجره يتثاوب غصنها من
يمر طاري البلابل
وليش اصدگ واني اعرفك والرغيف
نايم بحضن الخذاك ..
واني نايم عالرصيف
يل عفتني چي فقير
وروحي شمعه منين
ما جافيت اموع
رحت للشبعان ليش
واني هم شبعان جوع
گلبي صار بلون طبعي
البارحه تعشيت أصبعي
والصبح فزيت نايم
من اجاني الليل غبشه وگلي فوت
بيها قررت انتحر بس خفت اموت
وهيه اصلاً مو غريبه
هوه ضحالك بجيبه
واني ضحيت وجبت عش الفراشه
بلا رضاها
اني كاتل
اني گاطع .. بيدي ورده
وايدي متلطخه بنداها
بنص فراشات الحدايق ماعفتها
گلت اضوك اچفوفك الورده الجبتها
ايي اجيتك
برغم چان الباب فارغ
واگف لوحدي سرة
عيوني من المستحه افترن وره
وبين گفاهن
وكلشي جان هناك واگف
الا رجليه بقيت ارگض وراهن
ما لگيتك
بس فتت مني ولا چنك شفتني
گتلك شلونك – احبك –
گتلي وينك
تفطرت عيني بأثر خطوات عينك
جفني نزل راسه يمك
شابگ رموشي شبگ
وانته جفنك لو احط
فوگه جبل ما ينطبگ
اني وين؟
اني ذاك.. مگابلك بس من وراك
حتى من تطلع شمس توگف گبالي
ظلي ينزل من گفاك
اني وين
دموعي تتمشى اعلى طولي
وتوصل لجدمي واكظها الگاها عين
ابيش اصبر روحي واصبر
المايعرفك ما يثمنك
المشكله تعرفني زين
وشگگتني گبالي كاغد
ما شفت منك ولاذره خجل
واني من اهجيك
اجي اقرالك غزل
وهو صوجي
مدري صوج الملح ماصخ
صوج طبعي
لعبو بذيج الضفيره
واني باقي اضفر باصبعي
وهيه خلصت
واني سويت العليك
وما بقى بس العليمن ما دريت
اني من اقره قصيده حتى
اخلي دموعي تنشف
شيل ادينك
انته لو سديت اذانك بيتي يزحف
خلصت سنيني وراك وانته قيس
صارلي اسبوعين گاعد بالخميس
