حيدر الركابي
جروح مابعتهن واني محتاج
بعدهن جدد بكلبي حرامات
ولان جروحي يحترموهن الناس
كمت عالفقره أوزعهن هويات
إذا متسمعه صوتي بيه لتلوم
يقوه الصوت إذا تقل المسافات
وأنت اقرب مسافه من السموات
الهوه موجود بس يخنكني الاوداع
الناس البلمحطه بعيني أموات
ورده انت بحياتي ولمن تروح
وراك أنفاسي أودعهن فراشات
وذا وي كل حبيب تروح الأنفاس
تلكه شكد مكابر بالمحطات
بوداعك مايظل كل حيل وياي
عله عيوني شتظن يعبر سلامات
نظر عيني اختنك من كد الادموع
وبالكوه الك طلعت نظرات
كبل وياك راسي شكثر مرتاح
إلك لو للبلابل يسمع أصوات
بس بجفاك هسه براسي موجود
بس صوت القطار وضحك شمات
