كاظم الركابي
عثر طولي ولگيتج ناس
جست روحي وشفت
ملگاچ بي اهتم
يبنيه النهر چذاب لو
مامش عطش ينذم
يبنيه خذانه الخوف
وعيون الصبح تنباگ
دليني الشته بيا صوب
وجه الماي بارد والظنون واغماگ
وين احچيچ
يسالفتي الخذاها الشيب
ينزوة خاطري
الضيع طعمها العيب
وين احچيچ
طشرني خضار الگاع
لميني يريحة ياس
معذورين ما شافوچ
مايدرون .. من تنحل ظفيرة
ليل چم شفة گمر تنباس
ومايدرون .. لهفة عين كل
مشتاگ ماتطفى بسوالف كاس
الما ضايگ سمار اخدود ما ينلام
يبنيه التراچي اتطيح
لو مرهن نفس محتام
بديني اعله طولج طول
خصر العافيه استبرد
وازنود الجرف من طين
لو غثها البلم تعرگ
اخذيني وياج وشلة حيل
تشرب كل دفو بروحج
يا نجمة الصبح
مفضوح خاف الوادم اتلوحج
اضمچ وين وانتي اهواااااي
ياعين التگدر الليل
واطيوف العزيز اگصار
ياضحكة دفو امسيرين
ديرة هيل وادلال المضيف ازغار
يهنياله الغفه ابلا طيف
يحفظ مستحه عيونه
ويهنياله ال لگاله اشراع
ياخذ واهس اظنونه
ويهنياله
يهنياله الحضى ابلونه
