ناعور العشك
اسعد العبودي/ بغداد
ورى الطعنة العزيز الجرح ماله يعيش
مو كل الجروح تموت بيه اصناف
ومو بس اليفارك خله ذنب يشيل
يتحمل ذنبهه الفركة حتى الشاف
من اول شيبه طلعت بين التابوت
إعرفت مو مال احب ما بيه إطول خاف
ناعور العشك يغرف سوالف شوك
ويبدي الخلك ويموت اذا ينعاف
يالشايل كفه يعت خاطري المكسور
جنت ابنيك وادري تطيح بأول ساف
بركبتك ظل ذنب كل بلبل بلا بيت
مايشمرله عش لو بيه وفه الصفاف
ديرة موت وجهي يطبهه بس الليل
الرچيچ يخاف منهه الظهر ما تنحاف
كل ما انوي انام يعتني چف الطيف
اطشن واهسي بكل ظلمة وانا اخلاف
وجهك ضعت بين چفوف خشنه احساس
الحنه بچف خشن تنهان من تنداف
ادورك بالسوالف وين ماكو السان
تلكه عيون عايف وين ماكو اشفاف
اليقراني انذهل ما بيه كل موضوع
ما ينفهم لو ما للحديث اطراف
واكفلك لحد ما بنه العش الطير
العاين بيه يصفن غصن مدري جتاف
انا البيه جرح يمطر يعادل غيم
جبير ولو بخيط الشمس ما ينراف
شعوفك وانا زارع بانتظارك شيب
الجفه وطاريك طبكن چتفني اچتاف
