نوفل الصافي

النجمه من تموت
 لاتلبس عليها الدمع الاسود
الگمره تحبل كل شهر تنطيك نجمه
ارسم الطيف اليعجبك
وافتح اعيونك اتشوفه..
وابصم ابخد السمه اللون التريده
وللأمانه..
الگاع حره.. فشله تتخطط سجن!!
وللأمانة..
الدين حل المشكله.. عيب يصبح
مشكله وتبچي اعله حل
الله خير اچفوفه مليانه فراشات وسلام
المحبه اقرب طريق الباب حنية الإله
الزكاه واجب عله كل المشاعر
ابلايه حب .. تكفض اجفون البراءه
تنطفي الدنيه ويخوط الليل چايه بالصبح
تنچفي الذلـّه عله خدود
 الملح جربة دمع.
ابلايه شوگ ..
تنشف اللهفه ويفرخ
 ابليس بعيون الشمع
النخله أم
شجرة التفاح أم
ونومة العاشگ عبادة شرط
ماناسيله موعد
الگلوب الليلو اكلادة عرش
ما يطب الجنه من يرعب فراشة
آثم اليصنع مخده نوم
من ريش الحمام
الشهور الحرم عشرة الباقي عيد..
أحمر الشفه غروب يفتح الليل
اعله موسيقى الجمال
والتيمم جائز ابكحلة عراقيه اصيلة
العراقية الأصيلة
الشدّت ايزار الحصار
وطبخت ابجدر الصبر لمن سجد..
يمها كلشي ابّالك ايصبّح حلال
العراقي ..الينحني ابنيّة
وقوف ايعبـّرالجيل الوراه !!
الخط الأحمر يبدي من
باب الطفولة
من ابتسامة طفل مثلومة
علة اضفاف الشفايف
تاكل ابلبّة لهاتة
شوغة اخرس ترفس
 ابگلبه قصيدة
حوبة البلبل چبيرة
اتعثر الشط ّ و ثلث ترباع
من بحر التلوحة
الخط الاخضر يبدي
من باب الطفولة ..
ابطور “داخل”
والدللوش الحنينة
ابصوت فيروز
اليذكرني ابوطن منهوبة
 ترچية فراتة
طور داخل حرز عن غول المكابر
والـ (بنفسج) تنقره حين الولادة
اتگطـّر ابإذن الرضيع
ويّه كل فرة اگماط اتلولي فيروز
ابدللوش امهاتة
الخط الاحمر يبدي
من باب الطفولة
وينتهي ابخيط البريسم
خيط البريسم مقدس ..
شيلة الأم علم والـ (چِــلاّب) راية
والشبگ تنور أم حتة ـ لو باقي أثر ـ
يعتبر طالب لجوء