سامر رياض العبودي

ما وكفت بعينك انه العشره ذيج
اسرارنه الحب الدموع الذكريات
خنجرك ما خذ ركن عينه لكفاي
شاب وجروحي استحن كلهن بنات
انه بعيوني وكف فد شي قديم
هسه من اتذكره تردلي الحياة
عندي من ثوبك نفس شميته يوم
والله بعده بريتي كل ليله يبات
ظهري محني وما أكلك جي مشيت
انه كلش للجذب ما عندي ذات
بس كثر ما خنجرك نام بكفاي
ظهري أخذ من عنده كل هاي الصفات
عيني والنومه شرايج وانت وين
من الشرايج ترتجي يصيرن خوات
ألماخذك جا ما عرف عندك حبيب
ما فطن لسوالفك مستعملات
يا هبل كلبي ألكبالك مو بلال
تريد أكلك أحد للعزه ومناة
من مشيت لهسه ما بالعلي ريج
كمت كل ليله يتراوالي الممات
ابعدك عويفيتي شككها النحيب
سال بس خدود جرحي موردات
رمح غيرك نشز بصدري تعال
جروحي بعدك حيل احس مستغربات
جنت اخجل ارفع عيوني عليك
المستحه مكحل عيوني الذابلات
روحي طفله وانت أمها ومن مشيت
شعدها غير دموعها وطرف العباة
من أشوف اثنين يخنكني الحنين
وينترس كل بالي وعيوني امنيات
لغير ملحك جرحي مايعرف طريج
جروحي وي غيرك أحسهن ماصخات
وانت ما منك رجه احساسك خذوه
راح أسد بابك واكل لعيوني مات