كصايب لهفتي
مصطفى العياشي / كربلاء
فرعت بيدك دمعتي واخسرت عفه بيتهه
الدمعه مو قوه ضعف وانت بعنف لاويتهه
فلاح واسكي بوردتي جيت وغفل شميتهه
نسوان متروس السلف لاحكني عالحبيتهه
اني عله واهس خبرتي فرزنت فرق الوانهه
وانت اعله واهس منجلك عشوائي واختاريتهه..
اختاريتهه الجانت الي
والله من اعمق صفنتي
كل شعره بيه من القهر تلبس جفن خليتهه
اني الي راكب فكرتي ومخالف اهلي برايهم
متحدي وادم ديرتي وساحك بأذنهم صيتهه
وكاسر خشم شامت شهك من شاف ايدي بأيدهه..
وبدرب اليكرهوني اطب من ارد اروح لبيتهه..
واضفر كصايب لهفتي من انتضرهه عله الوعد
ولو واعدتهه ومااجت وتأخرت حسيتهه..
بدروبهه عيوني تظل
ويهلهل الشامت رمل
ويغني ويدكلي طبل مااجتك التانيتهه..
اعزل الحسره من النفس الهه النفس والحسره الي
المتمني ميمرهه الهوه انت بعصف مريتهه..
وعيونهه الجانت وطن نضراتي تسكن كاعهه..
انت بحلقتك والمهر عالحاضر احتليتهه
