بشار المشهداني
شگد اتمنيت كون الگاه
بس هو البلم ميعوف اثر بگفاه
ولك ملهوف
يلمظفور ويه الروح
توجعني امن افلن بيك
تراچي اتشربكن بزلوف
معذور
معذور امن اون معذور
السن البي زعل سالوفته الصرچة
لاتگلب علي وجهك
توهمني وأحس بداخلك محبوب
تره يگطع نصيب المحبس المگلوب
ابد ميفيدك اعلى الغير تتوچه
گاع النهر ماتستقبل الميتين
لذلك من تموت اتطوف السمچة
يلمچانك علو خفگة جنح يحتاج
شصعد والدرج سچة
شتريد اتسوي بيه اتمون….اجرحني
اجرحني النهر ماتوجعه الدچة
اجرحني الفتگ مايهم بالشبچة
بس دليني وينك كلشي الك يرخص…
وانه طبعي امن ادوور مثل طبع الصوت
اوكف وين مااخلص
بس بحضنتك يرجع
عليه الحيل واكوم اسوه
مثل الماي
من يتحاضن اويه البرد يتكَوه
غلطت اوياك بس بعده الگلب أبيض
اعذرني
مو وكت الزعل اللسان
مثل السمچة ماينكظ
والبي ضيم ينفض روحه من ايصيح
ظل وياي ماأنطيك
التراب لوحده مو مثل مابي ماي
ماتكدر تبوكه الريح
زانه شمدريني بيك بيا درب طبيت
هي الكاع وين اتطيح
شلون الغير فات ابينه بحلگه
وگبل بالزايد ايطب چان
بيني وبينك الشبگة
موكلمن يجيلك حاسبك محبوب
لتفك بابك الا تميز الدگة
انه شايل گلب يرهم گمر باليل
نظيف وبعده بخلگه
إليگلك بكلبي مگعد الشمات
يچذب بالجنان اجنازة ماتلگه
شوكت متعود الك مفتوح
مانه امن السهر مليت
ماگول الجفن ماينطبگ بس صار
يطول ايام بين الطبگة والطبگة.
