أحمد عميدي
مدلي ايد اذنك تلافة
الصار .. واشبگ صدري طين
تلگه دگات الحسافة ..
تخرمش سنيني أعله دين
وما تصافه .. ذاگ ناعورك
خبط كل صافي ليلي
وهوه لو يصبرلي حيلي .. ماخويت
وجان ميلك ما يدگ وانه انجويت
ابلايه ادين
الذكرى مايل وج سرجها
وماكو بصمة حافر المهر الهزيل
المو اصيل
العافني مناشغ افرفح ..
ويايه بس موتي دليل
وبقى ويايه بطوله يمشي ..
وانه اخط جرحي الطويل
گمر ليلي تغطى ظلمة ..
وماشوفه
گابع أبجيب الذليل .
طافي فانوس الرسايل
ويلهث استفهام خوفي ..
ياهو اليفكك حروفي
يخرخش بروحي الحنين
خرگة والدم راح اگعده ..
ولازم اليوم ايتشافه
ابقى ليش افتل بروحي
وبعدك يدردم صلافة !!
