الشهيد/ علي رشم
ترس روحي الضباب وبينت وياك
كلي بروحك امشي وجرحي ما شفته
انه بلنسمه اعثر وانت قيس الحال
مو جدمي وراك خيالي ما شلته
واجي بواهس عذر وحروفي مني اطيح
واتبده على وجهك مستحه وسكته
وانخل غير وجهك واليطيح تراب
وانكتهم واهزهم بس تضل انت
رمح فركاك اجاني مسابك ويه الريح
ماقصرت تسلم بالنفس جبته
((بس المحترك يفهم حجي الدخان
يعرف حرورته ويفهم سبب علته ))
مثل عاشك بغربه ومره وكت غروب
يفرفح من يمر طاري الهوه يموته
انه بخصر السنابل جم حلم ضميت
وطعم شبكت المنجل من رحت ضكته
الندى عمره مسافه ومن يطيح يموت
وانه بعمر النده وفجرك وصل وكته
اذا فوك الورد لو فوك صخره يطيح
ما تفرق بعد لو عمري طيحته
انه مبلل عشك يليبست ملكاك
رحت وخيال وجهك عيني حاضنته
واضفر بالخلك بلكت كصيبه يصير
وضوه جفوفك بصدرك الكاعه ضافرته
واغص بليل واكصر والمسافه اطول
واجي وتعثر عيوني بكل اثر عفته
واجي مغيم سهر يمك وانكط ليل
وطرت مو بالسمه لا بلحجي الكلته
وعكس خط الضوه روحك بروحه اطير
وعبرنه السابعه وجناحي ما درته
ولحد ثامن سمه وصلت الشهكه وياك
واسافر والتراب بجدمي ما دسته
ونكت ثيابي يمك جان بيهن غيم
من ثمن سمه للكاع وصلته
وزرعت الميل بيه وخضرت دكته
انت العلمتني شلون افك ذرعان
بالملكه الموادع ما تعلمته
من يكبر فراغك صدري جان يضيك
وانه البد بعطرك ما تنفسته
واكدر بالضوه بس ما رهم وياك
وعلى كد الشمس ملكاك فصلته
وافك نشاب صدري لكل سهم بي روح
واكفر بالحنين الما اجه بوكته
الترس راسي بغيابك ريحت البارود
ساتر والرصاص يخيط بكصته
طفه وجهي بخيالك لو بعد موجود
من نجمه على نجمه اليل ورثته
المطر يوكع مغمض والتراب يشوف
ما بللت وجهي وسافرت سكته
مو ما شفت وجهك ما شفت مكفاك
شمد ايدي وكفاف بعيني ما لحته
ينسمه وسافرت يم ناس مخنوكين
الهوه ضيك عليهم وانت كبرته
تعال اشلع الطين البي عرك ملكاك
بيا صحره نينك مشه قافلته
جبروك وطفيت واهسك وياي
كفرت بكلشي بعدك والعشك صنته
على برد العطش وتبده وجهك ماي
على كل حال كلبك روحي عاذرته
الله وياك كلبك روحي عاذرته
