تانيني
عباس رحيل/ واسط
تانيني
الضوه يفضح روازيني..
خل ينفض عباته الليل
وندوف المعاتب دوفت الحنه..
ونتبده نهر لو صلى بي مشحوف
يتوضى بسوالفنه..
تانيني..
اشعلاته الروج..النسمه الما تعرف اتطوف
ترسم فشلة الغرگان..
آنه وروحي اگظي الليل
ريح امدوهنه وتعصف..
اگلهه البير وتگلي حضن يوسف..
تعال ابروحي چم خنياب
والماله جرف ينعاف..
وإهي عثره ولگطهه ابخزرته الناطور
والفشله انچفت شطين..
رايح وين؟؟
رد هيبة صلاة الخوف..
يل ما تنگظي اشماحوف..
سير يانده الغبشه..
بعد بينه عمر لجدامك انطشه..
وبعدهي الشمس تندلنه..
وبعدهي الگمره شوگ وکاس
والنجمات تنطرنه..
وبعدني امطرز الچلمات
والمالبستهن راي..
رايح وين؟؟
وبالغربه العرف فانوس..
بعدني امناطرك قداح..
والظلمه اعتنت خطار ياريح التسولفني..
ويا ناي الچهبته وما يقشمرني. .
بتت فوگ اليشن لگطه و عثر
بيه الهوى مغتاض. .
ودثرت الظنه من اسنين. .
ويمر طيفك..
يمر طيفك..وافز دخان
تشربني مسية غروب..
ويمر طيفك..
وافيض بلهفة المرواح لوبيدر يلم روحه..
واصيح ابصوت عاودنه..
عاودنه..
ونتبده نهر لو صلى بي مشحوف. .
يتوضى بسوالفنه. …
