محمد خشين
لحّك ياكلب متاني الايام
سجّل ذكرياتك والعناوين
العمر كلمات ذكره وخطهه ممسوح
قديمه وحته مّلتهه الحياطين
ضدتني منهد ما صرت دنياي
مثل ضدت قريش لجيت الدين
عشت ميت كطع ضنت اليزورون
عتك كبره وتهدم واهله ناسين
يريت دموعي مثل الناس وارتاح
وافك من ريتي عبراتي السجاجين
صفت روحي دمعتي وبين الجفون
أموتن بس تفارك دّمعتي العين
لا تجبرني أسولف عن الهموم
أحير احجي عليمن وابتدي منين
أخاف امن احجي لا أذي اليسمعون
كلامي البالكلب مثل البراكين
الاخرس لو عزف ما يرحم الناي
يصير الناي من حسراته نصين
شبعد بالحيل من حرماني والحال
عله نكلت جدم مايكدر يعين
خيالي ابلا وزن بس كوه اعت بيه
علي صار اثكل امن جبال حمرين
وندم روحي اختلف مامنه بالناس
بزغر خّلاني اعض ابهام السنين
أشرد من مرارة واقعي بعيد
أطيرن لو نمت واحلامي جنحين
ومو معنه من انامن بالي مرتاح
من الجوع تلكه الفقره غافين
يريت من الجره بس ضاع ممشاي
انه جدم ودرب ضيعت الاثنين
