ما عذرج
سجاد التميمي
ما عذرج
اذا ما ارجع اسكر بيج
ونكع ديرتي بخمرج
احب كل الزواية البيج
مو كسرت خصر تنشاف
كسر مراية البخصرج
هية النجمة كذلة ليل
وانتي الليل طايح كذلة من شعرج
تعاي انلثك القمصان الليل
وياج بي حوبة…
ياعطوة التكضني وياج
يمن چم ركبة مطلوبة..
فاتح بالخضن بابين
اريد اتمر عصافيرج
وي جتاف السنابل كون
اريد الماي من تضحك نواعيرج..
خشنة سوالفي بغيرج
تذبل عيني يم غيرج
حيل الطيف مامعذور
من يلبس صور غيرج…
علة جتافج زلف سكران
شميتة وطحت مخمور
لو مابيج ماتنكال الخبزة
حجايت التنور. ..
تبدي بحضني ضحكة ماي
الكطرة بشارب الناعور
واشمنج شلب خدران
شارب كل سمار الطين
امن اذكرج يلتم الفراش
خضارج مدري اخذني لوين
قميصج خانك وﻻيات …
يالثوبج سمل حايوز
تشك زيجة حلاتة التين…
وكض اصبع ضواج واعبر
چم باب
انه من تراب…
بس شلون اقنع جنحج امن تراب
هنا فوكاي
تبدي زلوف شعر فياي
هية الكاع هم ترتاح من يتمدد البلاب
ماتبرد الشبكة وياج
الشيلة لو رخت يتعاتب الجلاب…
