يوسف الحلفي
شنو الحسبات ودتني اعله فيك باب
طرقني الليل بجفوف السهر كل خوف
كل فزة عشگ مكشوف
كل وجهي وسمار ادروب
خطف لونه ضحك سرداب
ضحك مركون للميتين بشفاف الليالي اتراب
وين انته العمر محتام كل گطره
يفيض امن الجزه اولايات تغنيت بسواد اغراب
خريف اجفاك من كل صوب شگگ كل ربيعي اعتاب
يعتگ كل وجه مخطوف بالظلمه وحنينه انجاس
هيست التعب مرتاح يم حيلي بضوه الگمره
امس غنيت يم وجه الفجر بالكاس
ولاحنيت عالماشين
يم عيني الخضار ايموت والروح اشتهتك ياس
البير اليختنگ مرات..يشتم وين سر للناس
من يدري اعله روحي الماي متعدي
القفص يرتاح للبلبل اذا غنه بحنين الگاع للبردي
سالفة النهر ناعور ماخذ كل سمار الروج ويبدي
الك وديتلك مرسوم متحني بحنين الغار
وين ادري بوجه كل فاس جم طبره
وين ادري العطش مرتاح مد روحه اعله كل صحره
مايدري الشجر معذور مگبرة الحطب كل نار
سافرت بوجه كل شاب
سافرت بجدم مطبوگ بس بروحي رزة باب
ادورك وين مابي العين سواجي الشيب تتبده
ادورك يم سما الله سنين بلكي اتحط ندى بورده
ادورك وي سمار الروح بمراية حزن روحي
تتفطر حلم ملگاك بس اتفز صدك روحي
هذاك الشيب صد بيه وعرف لوني
قبل ماينشرب كل كاس حنيت لمواويلك
لحن كل شوغه بظنوني
قبل ماينشرب كل كاس شربتك گبل كل خمره
بصورك شربت النوح بيك اتكاسر عيوني
عرفت الآه بالبيبان تعتگ لو حزنها انضاگ
بين المزنة والعاگول جم قصة عطش وفراگ
مر تابوت وارثيني بعشگ جذاب
خل ارتاح…مامرتاح
ترى الحسبات ودتني اعله فيك باب
