فاضل كريم
يل تضحك وتبتسم
ميغرني هذا الوجه
اني اعرف الجوه
ادري اعله كلبك وجه
يضحك بلف ياعلي
ويبتسم بالكوه
غير اني ابن الكصب ؟
شتريد مني اقتنع
بالمنجل امروه
ربعك اجوني امس
يحجولي عن الصلح
والزاد والخوه
ماداعي اشرح بعد
كل الحجيته سهل
والكلته ما وضحه
اتعنه للمكبره
واكعد بصف اي كبر
احجي الحجيته الك
عاتبني اذا ماصحه
كافي ابقى طيب كلب
كلما ادوس الخجل
انداس بالمستحه
اني مشيت الدرب
مو لأن كاضي بخت
بس غرني كثر الحجي
هاكثر ماتمدحه
سويته الي مو درب
نفس الصراط الذي
مذكور بالفاتحه
هم كلي بيمن اثق ؟
خايف اصاحب نبي
وخايف ارد للصدك
والكاهه هم مصلحه
فوكاهه درت الوجه
ذاك اعله زعلك زعل
شيفيد اسولف بعد
والردت اكوله انمحه
بلوه ابتلاني الوكت
اترحم اعله الشلب
تزعل عليه الرحه
بيه اني مية جرح
تلاثين من العدا
وسبعين من ربعي
كون من اعت الكلب
وياه اجر ضلعي
اغلط واكولن جزت
وماجوز من طبعي
الي يمر بحزن
كلبي عليه ينكسر
وعيوني اذا مابجت
اختاض من دمعي
والي يمر بعسر
بجفوفي احس بخدر
هاكثر ما ادعي
لو بيدي اصوغ الكلب
محبس والبسه عمر
خاطر اعضه ندم
كلما اعض صبعي
