عماد المطاريحي
العش مو حطب
خل يفهم الحطاب
العش بيت شرعي وساكناته طيور
وأحيانا يضم عشاك متصافين
إحلام
وأريكه ونافذه إعله النور
أعله غفله من الزمن لن بيتهن مهدوم
والغصن اليشيله من الاصل مبتور
الدستور
منقوص إعله هذا الحال
الحقيقه العشگ لازم ينكتب دستور
العصافير أعتراض إلهن أعله الحطاب جاب عشوشهن
ونطاها للتنور
أزرع كاع روحك رازقي ونسرين
واشتلها كصب من يشح ماي الهور
وافطم منجلك لوراد يحصد غيم
واكسر منجلك لو راد يحصد زور
واخذ دمعة عزيزك واستعيره أفراح
ولبسه العيد بيدك وأكشخ بعاشور أنشدني
العسل ماضايكه النحال القاروره بيده
والعسل محظور
من تلثم فراشه خدود زهره تنام
تسكر بالندى وتطيح بالمحذور
شارب من خضار عيونك الصفصاف
وراضع من بياض خدودك البلور
روح أشتل حياتي
بشجرة الصبير
أنا احلامي عوانس
مايهمها البور
أفرشلي ضحكتك
خلي امدد كيف
وخل في
الضفيره يدغدغ الناطور
تغرف روحي مني
بچفك النعسان
وتشربني خطيه وخاطرك مكسور
جمعنه المايصيرالبرد والنيران
شفتي تنث بروده
وشفتك تنث نور يقام الحد
على من لمس شفتك يوم
ويحاسب ، مثل مايتحاسب المخمور
اخذ مني دمع ماطالبك بالدين
يمته النهر راد فصول من ناعور
تدريني سليل الما يشم مشموم
ابن بيت العفاف الصاوغ الله نحور
بعد شبرين عنك والحضن ينخاك
أشم ريحة ثيابك
والكلب مسحور ياجنة عدن
يادنيه تنبت روز
ياسحر الهند وأحلام نيسابور
هسه الحب حضاره وبابها كرستال
تتلاكه المجره بكل مسيه تدور
أنا روحي ندى
وروح البنات ورود
أنا موتي ندى وكلب البنات أكبور
بالك تحط روحك
دكـه للتغسيل
جثمان الفرح
مافززه الكافور
