عبد الرحمن السراي

اذا ليلك كواغد والصبح نار
واذا وكتك عنب وجفوفك اكصار
مايسوه الفرح وشينفع العيد
معقوله الكزازه اتكسر الحجار
وبجت كان بدمع والفاعل ايصيح
تعالي انتي وخواتج شوفن الصار
الحزن خيم علينه ابضيم مجرور
ومنصوبه الفواتح والوكت جار
دنيا اشما افرهه بجفي مرتاح
الكاهه بعكس ماردته تندار
تكوم اهلا وسهلا تطرد الضيف
وعرض اجتافكم تتلكه خطار
وتيهنه الاذان وكمنه لغروب
نترجه بلال اذيع الأخبار
ومشينه بدرب ضايع ماله عنوان
ساكت والرصيف امحمل اسرار
وننشد بالسواتر والتوابيت
المدافع للحرب لو كبل الافطار
جذب ماي الكصص مانده الوجوه
وجذب بحر الشرف مايغسل العار
وشفت شاعر يغني وشاعر اينوح
ببيوت القصائد كاعد ايجار
وشفت جندي ابغرفته يحمي الحدود
وشفت فوك السواتر واكف فرار
تكلي شظل بعد ماسولفت بيه
اذكر قنعتك بالبرد حار
الحمامه اذكر كلتلك ضمهه للضيج
ربك مو بعيد يرزقك ابغار”