عصام كريم
بعد بيك امل يمرتب ترد انه
خلصنه التوسل فوك كبرك من توسلنه
راوينه المغيسل شاب يحلم ينغسل فوكا
ولا شايف كبل منه
وراوينه النجف تشيع ما مر عالدفانه
يالمضحكنه اول مره من عندك
نرد بوجوه حزنانه
ولوادم يعرفونه عزيز المات
من وجوه صحبانه
حگنه نلوم مو من عاتك تبعد
تعودنه عليك تغيب يوم وثاني يوم ترد
وتعلمنه عليك تضحك الجناز
مو بكلوبنه تمرعد
بديت بأضعف الايمان..
وراها من كلب ولسان..
سكيت الكاع دم عريس
من شفت الوطن عطشان
عندك بيت
(هز جذع اكصص خلي المذله اطيح)
ذكره عالسواتر جان…
يضايف للمرقط وليلبسونه
يسبحان ال له شتعب بعيونه
ويهنيال التراب الصار عطرك بي
ويحضن بيك خيعونه
ويصوت امك فتح لليل رازونه
مشه وما لاعب ام گذله على متونه
هذاك انت المتت وناس علموته يحسدونه
عايش جنت وشتميت
عطر الجنه بيك يفوح
حلو لحد شوفتك تترك طعم بالعين
بس بسوالفك مملوح
سرك لو هوه متسولفه المخنوك
شني شو من تحب مفضوح
من جان العنب عالغيم
بس انت الاديك تلوح
رايح وين كتلك من كبل لتروح
چوله هناك وليلحك الطريده يتيه
وعالشاطر غلطته بروح
من كل كتر يطلع نار
كلها تامرت كاع وزلم وسطوح
كتلك وين سميها
من كتلي الجرف امنت جي سابوح
