انيس العيساوي
من سمة عيونج بده
يطلع نهاري
وعاركت كل اسود التم
اعلة عيني
وكمت اشوف هواي
يحجون بسماري
وجان بية شكد خريف
ومن حضنتيني المطر
شاور خضاري
وانتظرتج بين اليخونون
يحبيبة ضمير
تخيلي شكبرة انتظاري
رتبيني والله ما ادري شريد
الف سجة كبالي
واتأخر قطاري
الحرب ترست راسي
واحلامي ضباب
وخوف ياكل باب رزقي
منين اجيب لرزقي باب
وناس متلثمين بهدوم الصلاة
سدو بوجهي الحياة
وجايبلي ايام مدري
منين ويريدون اعيش…
يومهم كلة حرب
واني غير الله وضحكتج
ما اريد امشي بدرب
جنت خايف
تنجفي الجبهة اعلة روحي
وما تجين
وجنت خايف
لا يموت الله بضميري
واطش دم الفقرة بتراب السنين
اتناوشيني
يا نعومة وجه كل الياسمين
اتناوشيني
يا سمة التمطر على ايامي حنين
اني ما احب السمة المابيها رب
شوية منج وانتميت لربي اكثر
وصحه بروحي انسان
جان بكلشي يعثر
انكسر كلشي بداخلة
وما غده الشر
ومن عشكتج صار
يوم الله جديد
وكمت ما اخاف
من افكر للبعيد
وشلت من راسي
تفاصيل الخراب
وفكرة الموت القريبة
وخاف اموت واني
ما حاضن حبيبة
يا حبيبة اخذيني
من كلشي جذب
ريحة البارود والدم والرياء
ما يجيبن بس حقد
واني اريد ابقى عذب
يا حبيبة الحرب ضيم
ومدري بسنيني شتذب
كلشي ماكو بروحي
بس انت اميرة
وكلشي غركني
بزماني وانت
بعيونج جزيرة
كل مكان يكودني
الكاني غريب
وغير حضنج ما لكيت
لروحي ديرة
شكد حرير ينام
بجتافج ضفيرة
ومره ياخذني الخيال
وانسى روحي
بنص حكايات الطفولة
وذيج الايام الفقيرة
وهم اغمض عيني
والكاج الاميرة
