حيـدر النــوري
اجيت امن الدوام وشفت تابوت
اباب اهلي وسمعت اصياح نسوان.
انوخذ كلبي انعصر كل حيل الأجدام
اريد اركض وحسن جدمي تعبان.
امشي وربي اكول المر عله البال
يارب كون اصيرن بيه غلطان.
وصلت وشفت ابوي امهدل الزيج
وأمي وأخوتي وملتمه جيران.
شالو نعشك وصحت اوكفو اشلون
يروح وما اودعه واحنه خوان.
تريد اوداع روحك روحي وتشوف
صعدت روحك وطحت انه بنيان.
ركضت للسمه من طلعت الروح
ومن رجعت علي فزيت فحطان.
يغالي ومن رحت وجه الفرح راح
وحشه البيت جنه عيون عميان.
المطر خويه الي ينزل تشربه الكاع
امدفيك الجفن لوهسه بردان.
اشرب ماي اذكرك وشمر الماي
أحس صوتك ابأذني تصيح عطشان.
عليك اتعودت وتعوفني اشلون
تريد الصدك خويه اعليك زعلان.
بليل ولانجوم ولا كمر لاح
ركبت اضنوني مهره بشوك ولهان.
بصحره وكطعته وذبتني وياه
اجر غركان جني بجرت العنان.
متن جفني انكسر من حمل الانعاس
ارفعه ويرف فوك العين خدران.
من كد السهر كمت انده النوم
يفز ويوخر ادي ويكلي نعسان.
من حجيك وثكلك حبتك ناس
هم عندك اهناك هواي صحبان.
هم تحجيلهم عن كعدتي اوياك
بسوالفنه وشقانه وسهر رمضان.
جثتك صوت مدفونه بكبر ماي
ياماي اليطلع صوت غركان.
احس عمري انزرف جربه بحلك كاع
ويمك خويه اريد اتحطلي مكان.
