قاسم بخيت
بخي روحي الحاره بموگد هواچ
بلكي ابرد من هواچ
ادهدي ماي ….
مدي طولچ ليل يرتاچ بشتاي ..
ادني يمي ….
عندي الچ گوشر سوالف
بايته سنين بلهاتي
ارد اسولفهن تعاي
ارد افرع كلشي بيه
وازغر بعمر اللعب يمچ وبوح
سر. رغبتي اللابده بنص مستحاي…
ادني يمي ..
بيه الچ شوغة شلب وشفافي گيض ..
وانتي دهله من الغوه وملگاچ. فيض ….
ادني يمي
نگطي صوت …
كاسري الوحشه الدبت بعيوني موت …
سيري تعلولت گمر ليلي اشتهاچ
وفكي ريجي الباهت بشيرة ضواچ
انتي يل همسچ عوافي
وشبگت عيونچ أمان …
ونمرش اچفوفج برد غبشه وشذاچ ..
ينده البيه ويچملني عمر ….
وشتهيچ …
طويره حره
حاطه براگ السلف
ماطلع حس الزلفها
ولا تمشرگ ليلها بحظرت شمس
ولا سمع شباچها
مگاطف همس
ولا دنه الحجرتها ذيب
ولا غفه بچفها اسم ريحة غريب
انتي هيچ …
خرزه كهرب غافيه بصرت عجوز
وانه اصبع خام
ماضايگ شذر
ماتجين نملچ الحلمين چف طين وجذر
ونستراح وكيف واهسنه يطيب
وننشتل شهگة شفايف
تحلم أبوسة حبيب ..
هيچ احلم نلتم بديرت غرام
ديره مابيها ازدحام
ديره بيها النيه جام
ديرة ام لايذ بسدها الحمام
