عادل الصويري
صحت من دولاب هجرك بيه دار
كونك اتشوف اشلعب بيه العشكَـ
كَـلبي كاغد وابرضاته ايمر عليك
كَـبلي ياكاغد مشه بدرب الحركَـ
على قمـّة شمعتك صرْت آنه خيط
خلص من كَـد مايضوّيلك صدكَـ
العصافيرك شجره سوّيت الجروح
من بعد ماجان صبحك مختنكَـ
من شفت شمـّاتي شايل بيده فاس
جفـّك اتبرّع يدلـّي اعله العركَـ
والله لو تدري بشبابيجي اشتراب
امغطـّي عمري وكَـلبي بسـْمك ظل يدكَـ
وهيه سوله ومنهه ما اكدر اجوز
اشما اريد اطفيك ترجع تعتلكَـ
ابصدري ماريد النفس هاك اخذه هاك
لن عكَـب عينك خناجر ينشهكَـ
الفركَـه (طف ) وشمسي طاحت بالمغيب
اوْ حافر اغروبك تولاّني سحكَـ
